Qeveria miratoi vendimin, në kufirin Maqedoni-Kosovë me letërnjoftime

Pas negociatave disamujore është arritur marrëveshja në mes qeverive të të dyja vendeve për kalim të kufijve me letërnjoftim biometrik, e cila tanimë është miratuar edhe nga Qeveria e Maqedonisë, konfirmon zëdhënësi i Qeverisë, Muhamet Hoxha.

Ai shpjegon se marrëveshja do të duhet të kalojë për ratifikim në kuvendet e të dyja vendeve dhe pas saj qytetarët do të mund lirshëm të kalojnë kufirin vetëm me letërnjoftime.

“Në seancën e fundit ne e kaluam marrëveshjen e harmonizuar mes dy vendeve dhe njëkohësisht obliguam ministrin e Punëve të Jashtme, zotri Popovskin, që të nënshkruaj këtë marrëveshje me ministrin e Jashtëm të Kosovës, marrëveshje e cila më pas me propozim-ligj do të vijë për ratifikim në Parlamentin e Maqedonisë dhe pas ratifikimit kjo marrëveshje do të hyjë në fuqi, dhe të gjithë qytetarët, pra shtetasit e të dy vendeve, mund të kalojnë në të gjitha kalimet kufitare me Republikën e Kosovës me letërnjoftim biometrik”- deklaroi zëdhënësi i Qeverisë së RM-së, Muhamet Hoxha.

Ndërkohë, BDI përshëndet vendimin e Qeverisë për miratimin e marrëveshjes për kalimin e kufirit vetëm me letërnjoftime.

“Duke iu dhuruar qytetarëve në përgjithësi dhe shqiptarëve në veçanti  një lajm të shumëpritur, BDI dhe kryetari i saj, Ali Ahmeti, ndjehen të lumtur që së shpejti shtetasit e njërit apo shtetit tjetër mund të hyjnë në territorin përkatës me letërnjoftime biometrike dhe pa viza në të gjitha vendkalimet kufitare, kurse opinionit publik i dërgohet edhe një sinjal pozitiv se përfaqësuesit shqiptarë në Qeverinë e Maqedonisë kanë sens dhe gatishmëri që t’i artikojnë drejt interesat kombëtare të shqiptarëve, pa marrë parasysh se ku jetojnë ata”- thuhet nga BDI.

Sipas autoriteteve, marrëveshja bindshëm do të lehtësojë lëvizjen e qytetarëve të të dy shteteve dhe të ndikojë në përafrimin e dy vendeve. Marrëveshja është në kuadër të bashkëpunimit rajonal, që Maqedonia e ka me vendet e rajonit. (Ersan Pajaziti, TVM2)