Kosova nuk u votua të jetë pjesë e UNESCO-s

Kosovës iu deshën edhe 3 vota që të jetë pjesë e UNESCO-s, mirëpo fushata negative e Serbisë dhe Rusisë i ka bindur një sërë shtetesh që të mos e votojnë Kosovën në UNESCO.

 

Në Paris, ku po mbahet mbledhja e Asamblesë së Përgjithshme të UNESCO-s, paraprakisht përfaqësuesit e Serbisë fillimisht kanë kërkuar që kjo pikë e rendit të ditës të shtyhet për në vitin 2017, por votimi në UNESCO ka përfunduar dhe ka qenë kundër kërkesës së Serbisë dhe pro që pranimi i Kosovës në UNESCO të jetë pikë e rendit të ditës.

 

Kundër propozimit të Serbisë kanë votuar 89 shtete, ndërsa për propozimin e saj kanë qenë 59 shtete, e të përmbajtur kanë qenë 22 shtete.

 

Zëvendëskryeministri i Kosovës, Hashim Thaçi, ka njoftuar se Serbia dhe Rusia nuk ia dolën ta shtyjnë anëtarësimin e Kosovës në UNESCO.

 

Sipas tij, propozimi serb dhe ai rus u rrëzuan përfundimisht.