Vota kundër Kosovës në UNESCO, ndërkombëtarët: Fyerje për ambiciet e Kosovës

Mosanëtarësimi i Kosovës në Organizatën për Edukim, Shkencë dhe Kulturë e Kombeve të Bashkuara ka ngjallë reagime edhe te ndërkombëtarët dhe ambasadorët e huaj në Kosovë, por edhe të liderëve të Kosovës. Ata e kanë konsideruar votim zhgënjyes, kur dihet se vetëm për 3 vota Kosova nuk arriti të bëhet pjesë e kësaj organizate të rëndësishme ndërkombëtare. 

 

Nënkryetarja e Parlamentit Evropian, Ulrike Lunacek, thotë se refuzimi i ngushtë për 3 vota i Kosovës në UNESCO është një fyerje për ambiciet që ka Kosova për integrimet në organizata.

 

Ambasadori i Shteteve të Bashkuara të Amerikës në Kosovë, Greg Delauie, thotë se vota e sotme në UNESCO është zhgënjyese, por 92 vota tregojnë se Kosova ka një vend të rëndësishëm në bashkësinë ndërkombëtare. 

 

Edhe ambasadori i Britanisë së Madhe, Ruairi O’Connel, shprehu  zhgënjimin e tij. Ne punuam shumë për lobim, sepse Kosova e meriton dhe ka nevojë për njohje ndërkombëtare, thotë  O’Connel.  

 

Ka reaguar edhe presidentja, Atifete Jahjaga.“Mosanëtarësimi i Kosovës në UNESCO është një shans i humbur për avancimin e vizionit, vlerave dhe qëllimeve që i synon kjo agjenci e OKB-së dhe promovimin e këtyre vlerave në Kosovë”.

 

 

Mediat serbe, ndërkohë, e kanë vlerësuar votimin e sotëm si fitore të Serbisë.