Raporti - rasti i Kumanovës, KE rikujton institucionet të zbardhin drejtë rastin

Sipas Bakiut, marrëdhëniet ndëretnike nuk janë të brishta siç thuhet në raport, por janë tejet të brishta.

 

Në raport më tej thuhet: “Ekziston mungesë e besimit midis komuniteteve dhe tensionet ndëretnike vazhdojnë.

 

Nevojiten iniciativa të mëtejme, që do të promovojnë marrëdhënie të mira ndëretnike. Zbatimi i Marrëveshjes së Ohrit, përfshirë edhe politikat rekomanduese, do të duhet me urgjencë të përfundohen dhe të zbatohen”.

 

“Nuk është diçka e papritur, është diçka e pritshme dhe mbase nuk e reflekton realitetin e plotë për sa i përket marrëdhënieve ndëretnike, sepse për mendimin tim ato janë ende më të brishta. Mendoj se në raport kemi një dozë të lartë, siç përdoret edhe zakonisht, të shprehjes diplomatike për sa i përket marrëdhënieve ndëretnike”- deklaroi analisti, Qashif Bakiu.

 

Ndërkaq, sa i takon rastit të Kumanovës, në një fjali thuhet se ngjarjet e “Kumanovës” akoma duhet të hetohen në tërësi.

 

 

Analisti Bakiu thotë se me këtë vlerësim bëhet e ditur se ka shumë të paqarta mbi këto raste, ndërkaq kritikohet puna e institucioneve të cilat punojnë në baza etnike.

 

 

Sipas Bakiut, nëse institucionet dështojnë me zbardhjen e drejtë të këtij rasti, kjo do të ndikojë shumë në raportet ndëretnike, por edhe në raportin qytetar-shtet, duke u thelluar vija e mosbesimit ndaj institucioneve të shtetit.