Boksi ka mbret të ri, ai është Tyson Fury

55 mijë të pranishmit në “Esprit Arena” të Dusseldorfit u bënë dëshmitarë të rënies së një miti, pasi Klitschko u dorëzua në verdiktin final të gjyqtarëve të cilët votuan në unanimitet 3-0 në favor të gjigandit ishullor. I pathyer që prej 25 ndeshjesh, ukrainasi nuk e vendosi asnjëherë në vështirësi rivalin e tij pasi pesha e 39 viteve mbi supet e tij i rezervoi një surprizë të hidhur, ndoshta atë që do të mbahet mend më gjatë në karrierën e tij të pabesueshme ku mbante titujt WBA-IBF-WBO.

27-vjeçari britanik, 206 cm i gjatë dhe me peshë trupore 117 kg u shfaq menjëherë agresiv që në raundet e para duke e vënë në vështirësi kampionin që e vuajti gjatë gjithë 12 raundeve gjatësinë e kundërshtarit pasi ukrainasi është vetëm 1.98 cm i gjatë.

Kombinimet e shpejta dhe ndryshimi i ritmit herë pas here nga Fury e bënë Klitchkon të nxirrte në pah anët e tij të dobëta sepse 27-vjeçari vallëzoi në ring.

Fury ia dha shumë pak herë mundësinë ukrainasit për ta mbërthyer në cepat e arenës, madje në pjesën dërrmuese të raundeve nuk i kurseu silurët e tij drejt fytyrës së kampionit në fuqi, i cili tashmë ka një mundësi për revansh.

Sipas mediave britanike, përballja e radhës mund të zhvillohet në stadiumin “Wembley” por fjalën e fundit me shumë mundësi do ta thotë 39-vjeçari ukrainas, ndërsa në krahun tjetër, Fury ka një mundësi të artë për të unifikuar të katër titujt nëse pranon të sfidojë edhe mbajtësin e gjerdanit WBC.

Kampioni i ri ka lindur në Irlandë por pak kohë më pas u transferua bashkë me familjen në Manchester dhe emrin Tyson e mban falë adhurimit që ka për Mike Tyson.

Karriera e tij është rritur gradualisht por mbi të gjitha ai dallohet për batutat thumbuese ndaj kundërshtarëve