Sindikata e Pavarur e Gazetarëve të Maqedonisë kërkon marrëveshje kolektive

Rroga minimale për gazetarët të jetë rreth 20 mijë denarë, aq sa është rroga mesatare në shtet, kohën jashtë orarit që e punojnë gazetarët, kameramanët, fotoreporterët t’u paguhet, redaksitë të pyeten nëse pajtohen me emërimin e redaktorëve, të mbrohen të drejtat autoriale, të vendoset numri minimal i të punësuarve në një medium, të pengohet mobingu struktural, këto janë disa nga kërkesat që Sindikata e Pavarur e Gazetarëve të Maqedonisë i ka përfshirë në propozimin e tyre për marrëveshje kolektive për gazetarë dhe punëtorë medial.

 

“Pozicioni i Sindikatës në lidhje me lirinë e gazetarëve dhe lirisë së mediave është i qartë: përderisa gazetarët dhe punëtorët medial punojnë nën kërcënime se do të largohen nga puna, me degradime, me dënime, ata nuk do të prodhojnë prodhim të lirë, profesional dhe të balancuar”- deklaroi kryetarja e SPGM-së, Tamara Çausidis.

 

Çausidis thotë se pasi që jemi në një situatë ku profesioni ynë nënvleftësohet, diskreditohet, kanë përgatitur marrëveshjen kolektive me të cilën do të trokasin në derën e punëdhënësve për të rregulluar marrëdhëniet.

 

Gazetarët janë më të interesuar të punojnë në media të forta, të suksesshme dhe fitimprurëse, tha Causidis.