Bashkëpunim ndërkufitar Maqedoni – Greqi, Shabani: Do të financohen projekte në 4 rajone

Sipas ministrit të Vetëqeverisjes Lokale, Lirim Shabanit, me këtë program parashihet të financohen projekte në vlerë prej mbi 45 milion euro, të cilat do të implementohen në 5 rajone të Greqisë dhe në 4 rajone të Maqedonisë.

 

“Qëllimi kryesor i programit është përmirësimi i kohezionit territorial, duke përmirësuar standardet e jetës dhe krijimin e vendeve të reja të punës, mirëmbajtja e mjedisit jetësor dhe përdorimi i drejtë i burimeve natyrore në zhvillimin e turizmit”- deklaroi ministri i Vetëqeverisjes Lokale, Lirim Shabani.

 

Ai u bëri thirrje të gjitha palëve të interesuara që të aplikojnë me projekt-aktivitete të përbashkëta në arritjen e rezultateve të përbashkëta.

 

Sipas tij, projektet me të cilat do të aplikohet do të nxisin frymën e bashkëpunimit ndërkufitar në veçanti dhe do t’i përforcojnë edhe më tepër aktivitetet e bashkëpunimit evropian.