Francë, sulmohet mësuesi, agresori përmend “Shtetin Islamik”
Një mësues u sulmua në klasën e tij në një shkollë të periferisë veriore të Parisit, Aubervilliers, nga një person, i cili në akt e sipër përmendi “Shtetin Islamik”...
Ngjarja ndodhi në kohën kur mësuesi ishte vetëm në klasë. Agresori-sipas mediave franceze,-ka përdorur një prerëse letrash e një palë gërshërë, mjaftueshëm sa për ta plagosur viktimën e tij, duke e çarë në fyt.
Këto në fakt ishin mjete që i gjeti aty për aty, pasi në shkollë ka hyrë i paarmatosur, edhe pse në kokë mbante një maskë. Jeta e mësuesit nuk është në rrezik, ndërsa policia është vënë në kërkim të agresorit, që u largua me shpejtësi nga vendngjarja.
Sipas një prokurori të zonës, burri ka thirrur me të madhe: është “Shteti Islamik” dhe ky për ju është një paralajmërim.
Pas kësaj është larguar në këmbë. Franca vazhdon të mbetet në gjendje alarmi, pas sulmeve terroriste të 13 nëntorit në Paris, ku humbën jetën 130 vetë. Dega e Anti-terrorit pranë zyrës së kryeprokurorit në Paris nisi menjëherë një hetim për tentativë për vrasje të lidhur me një akt terrorist.