Kriza e emigrantëve, BE inkurajon Shkupin, paralajmëron ndihmë shtesë

 

“Në përgjigje të situatës me emigrantë, shumë aktivitete janë ndërmarrë  në kohë,  përfshirë ato në takimin e vendeve të Ballkanit Perëndimor si dhe angazhimin e “Fronteks”-it. Të gjithë ballafaqohemi me migracionit. Sfidat e BE-së janë edhe sfidat e Ballkanit perëndimor dhe zgjidhjet e BE-së janë edhe tonat”- deklaroi zëvendëskryeministri për çështje evropiane, Fatmir Besimi.

 

BE inkurajon Shkupin për përpjekjet dhe koordinimin me emigrantët, ndërkaq do të vazhdojë të jetë partner lojal në tranzitimin e refugjatëve, theksoi euroambasadori, Aivo Orav.

 

“BE tashmë ka dhënë 3 milion euro si ndihmë humanitare për shtetin. Javën e kaluar Komisioni Evropian paralajmëroi edhe 13 milion euro shtesë për Maqedoninë dhe Serbinë. BE është e gatshme të ndihmojë vendin me refugjatët, sepse respekti i dinjitetit të njeriut është prioritet i BE-së”- tha euroambasadori, Aivo Orav.

 

Ministri i Brendshëm, Oliver Spasovski, me këtë rast tha se çështja me emigrantët ka ngarkuar mjaft vendin si në buxhet ashtu edhe në menaxhim.

 

“Në gjashtë muajt e kaluar janë bërë numër i konsiderueshëm ndryshime ligjesh, me qëllim që t’ju mundësohet shtetasve të huaj te pikat kufitare t’iu njihet e drejta e azilit. Këto masa kishin dy qëllime kryesore, i pari që policia të ketë evidencë më të mirë mbi emigrantët dhe i dyti emigrantët të mund ta legalizojnë lejeqëndrimin në vend, me të cilin në disponim do të kishin edhe mjetet për transport publik”- tha ministri i Brendshëm, Oliver Spasovski.

 

Maqedonia, si shtet me dy milion banorë, e ka të vështirë të ballafaqohet me rutën e emigrantëve, thanë nga zyra e UNDP-së në vend, ndërkaq koordinatorët për Ballkanin Perëndimor theksuan se përfundimet nga konferenca e sotme do të jenë të dobishme për qeverinë mbi menaxhimin dhe ndihmën për emigrantët.