Nxënësit e katër shkollave të Shkupit si dëshirë të Vitit të Ri e kanë ajrin e pastër

Këtë dëshirë ata në bashkëpunim me Institutin e Shëndetit Publik dhe Qendrën për Hulumtim dhe Informim për Ambientin Jetësor vetëdijen ekologjike do ta përcjellin te bartësit e funksioneve, kryetarët e komunave dhe ndotësit potencial nëpërmjet 300 kartolinave me vizatimet e tyre, me temë “Pse është ndotur ajri?”.

 

Të rinjtë më së shumti pësojnë nga ndotja e ajrit, pasi 50 deri në 60% e sëmundjeve te fëmijët kanë të bëjnë me mushkëritë, theksojnë nga Instituti i Shëndetit Publik. 

 

“Fëmijët janë qenie specifike biologjike, të cilët janë veçanërisht të ndjeshëm nga ndotja e ajrit. Organet e tyre të frymëmarrjes janë shumë të vogla, të ngushta dhe çfarëdo iritimi menjëherë shkakton pasoja”- tha Dragan Gjorgjiev nga Instituti i Shëndetit Publik.

 

I pyetur nëse Instituti do të kërkojë ndërprerjen e procesit arsimor për shkak të ndotjes, Gjorgjiev tha se i takon Ministrisë të vendosë se si do ta organizojë procesin mësimor, por fëmijët sa më pak duhet të nxirren jashtë.

 

Por, ai njëherit theksoi se ndotja do të jetë e pranishme deri në mars, prandaj nuk mund të ndërpritet mësimi deri atëherë.