Barcelona, klubi me më shumë trofe ndërkombëtarë

Blaugranat të cilët në dekadën e fundit kanë fituar plot 26 trofe duke bërë epokë, falë suksesit në finalen e Botërorit të klubeve ndaj River Plate e kanë cuar në 22 numrin e titujve ndërkombëtarë.

Me triumfin që arriti në Yokohama të Japonisë, Barca e ka zgjatur edhe me një trofe më tepër avantazhin ndaj Realit të Madridit, Milanit dhe egjiptianëve të Al Ahly që numërojnë 20 tituj ndërkombëtarë.

 

Suksesi në finalen e Champions  e Leagues që u zhvillua në Berlin ndaj Juventusit verën e kaluar, bëri që katalanasit të barazonin këto tre klube në këtë klasfikim special.

 

Për të parakaluar Realin, Milanin dhe Al Ahly në renditje, Barcës i mjaftoi fitorja e Superkupës së Europës në Tbilisi ndaj Sevillas, për të ardhur në fund te triumfi në Botërorin e Klubeve, sukses ky që kurorëzoi një vit 2015-të të jashtëzakonshëm për skuadrën e Luis Enriques.

 

Për të arritur kuotën e 22 trofeve ndërkombëtarë, Barcelona ka fituar 5 Champions League, 3 Botërore për klube, 5 Superkupa Europe, 4 Kupa Kupash, 3 Inter-Cities Fairs Cup, kompeticion ky që nuk ekziston më dhe 2 Kupa Latine.

 

Historia e sukseve të mëdha të Barcës nisi në vitin 2006, me atë fitore 2-1 ndaj Arsenalit në finalen e Champions League që u luajt në Stade de France.

 

Ai ishte titulli i 13-të ndërkombëtar  i fituar nga Barcelona që gjatë 9 viteve në vazhdim pasoi edhe me 9 trofe të tjerë për një total prej 22 titujsh ndërkombëtarë.

 

Ajo që mund të themi pas të gjitha këtyre, është shumë e thjeshtë: “Ndodhemi në epokën e Barcelonës skuadrës që po bën ligjin në futbollin europian dhe atë Botëror”.