Një vit nga terrori, “Charlie Hebdo” provokon sërish

Kopertina ka shkaktuar një reagim të gjerë te të gjithë besimtarët, si ata të krishterë, ashtu dhe te myslimanët. Titulli që mban numri special i revistës është “Vrasësi i vërtetë mbetet ende në kërkim”, duke iu referuar kështu Zotit. Në brendësi të revistës janë edhe karikaturat e viktimave, si dhe një editorial i shkruar nga drejtori i tanishëm, Laurent Sourisseau. Në editorial, ai dënon të gjithë personat, që, sipas tij, u janë fashitur sytë nga feja. 

 

Ndërkohë, në njëvjetorin e masakrës së Parisit, me nismën e presidentit francez, Francois Hollande, në kryeqytet është vendosur një pllakë mermeri, ku janë gdhendur emrat e 11 viktimave të “Charlie Hebdo”, por gjatë ceremonisë zyrtare u vu re se, emri i njërit prej viktimave ishte shkruar gabimisht. Kjo është diktuar nga gazetarët, të cilët ishin të pranishëm në ish-zyrat e “Charlie Hebdo” dhe që vunë re gabimin te mbiemri i Georges Volinski. Për këtë gjë është premtuar korrigjimi brenda 48 orëve të ardhshme. 

 

Franca përkujton këtë javë viktimat e sulmit terrorist të militantëve të “Shtetit Islamik” në redaksinë e revistës satirike dhe në një market, me eulogji dhe ceremoni përkujtimore. Më datat 7-8-9 janar në Paris do të mbahen ceremoni në nder të 17 viktimave, ndërkohë që kryeqyteti francez është nën masa të rrepta sigurie, që prej sulmeve të nëntorit që i morën jetën edhe 130 personave të tjerë.  

 

“Charlie Hebdo”, e njohur për kopertinat e saj satirike për liderët fetarë dhe politikë, humbi stafin e saj në mëngjesin e 7 janarit të vitit 2015 teksa 2 militantë të “Shtetit Islamik” arritën të hyjnë në ambientet e redaksisë dhe hapën zjarr.