Federer e Djokoviç në gjysmëfinalen e “Australian Open”

Novak Djokovic dhe Roger Federer avancuan pa më të voglin problem në gjysëmfinale dhe tashmë do të masin forcat me njëri-tjetrin për të qenë pjesë e finales së madhe të Grand-Slamit të parë të vitit. Nishikori dhe Berdych nuk bënë aspak rezistencë përballë dy prej tentistëve më të mirë në qarkullim duke u dorëzuar pa kushte.

 

3-0 me sete triumfoi Djokovic në çerekfinalen ndaj japonezit Kei Nishikori. 28-vjeçari serb vijon kështu marshimin drejt titullit të tij të 6-të në “Australian Open” dhe trofeut të 5-të në 6 vitet e fundit në turneun që zhvillohet në Melbourne.

 

Në çerekfinalen përballë Nishikorit, Djokovic-it iu nevojitën 2 orë e 10 minuta lojë për të hedhur knock-out tenistin japonez. Numri 1 i Botës triumfoi me shifrat 6-3, 6-2, 6-4 dhe tashmë për të vjen dueli ndaj Federer. Zvicerani ashtu si Djokovic nuk e pati të vështirë të mposhte Thomas Berdych.

 

Vetëm në setin e parë rezistoi disi tenisti çek, duke e cuar në tiebreak aty ku numri 3 i Botës triumfoi me shifrat 7-4. Dy setet pasardhëse folën vetëm për Federer-in, i cili u imponua ndaj Berdych 6-2 në të dytin dhe 6-4 në setin e tretë. Falë këtij suksesi mbreti Roger u bë gjysëmfinalisti më i vjetër në moshë i “Australian Open” që pas Colin Dibley në 1979-n. 

 

Për Federer kjo ndaj Djokovic në Melbourne do të gjysmëfinalja e 39-të në karrierë në një turne Slam.

 

Në kategorinë e femrave ndërkohë, gjysmëfinalja e parë do të diskutohet mes numrit 1 të Botës amerikanes Serena Williams dhe polakes Agnjeska Radwanska.

 

Williams mundi shumë thjeshtë në çerekfinale rusen Maria Sharapova. Vetëm 5 game humbi në total amerikanja përballë Mashës me Serenën që mbylli gjithçka në 1 orë e 33 minuta lojë me shifrat 6-4, 6-1. Edhe Radwanska nuk shpenzoi shumë energji në duelin ndaj spanjolle Carla Suarez Navarro të cilin e mposhti 2-0 me sete me shifrat 6-1, 6-3.