KShZ miraton planin operativ për kontrollin e të dhënave

Tre ekipe nga IT kompani të ndryshme dhe ekspertë të zgjedhur, nga të cilat dy vendore dhe një ndërkombëtare, janë pjesë e planit operativ që miratoi sot Komisioni Shtetëror i Zgjedhjeve, me të cilën do t’i qaset kontrollit të trefishtë, duke shfrytëzuar të dhënat e njëjta bazë pas miratimit të metodologjisë nga partitë politike për pastrimin e regjistrit zgjedhor.

 

Bëhet fjalë për të dhëna të cilat do t’i marrim nga dhjetë institucione shtetërore, që tanimë janë realizuar kontakte, tha kryetari i KShZ-së, Aleksandar Çiçakovski.

 

“Ideja është që IT ekspertët të na ndihmojnë gjatë përgatitjes organizative-teknike gjatë kontrollit. Që të shmanget subjektivizmi dhe zvarritja e gjithë procesit vendosëm që implementimin ta kryejnë tre IT ekipe. Pas këshillave të IT ekspertëve, gjatë përgatitjes për implementimin e dy metodologjive, të cilat do t’i miratojmë pas harmonizimit të qëndrimeve të katër partive politike, duam të futemi në proces të zgjedhjes së tyre, që të jemi të gatshëm për implementim”- deklaroi kryetari i KShZ-së, Aleksandar Çiçakovski.

 

Në listën e institucioneve, prej ku do t’i merr të dhënat KSHZ-ja, janë: Fondi për Sigurim Shëndetësor, Agjencia për Punësim, Regjistri Qendror, Fondi për Sigurim Pensional dhe Invalidor, Agjencia e Kadastrës, Drejtoria për Udhëheqjen me të Dhënat Amë, Drejtoria e të Hyrave Publike, Ministria e Bujqësisë, Ministria e Punës dhe Politikës Sociale dhe Banka Popullore e Maqedonisë.

 

KShZ gjithashtu miratoi edhe kushtet të cilat do të duhet t’i përmbushin kompanitë dhe ekspertët që do të kyçen në procesin e kontrollit, rregulloren e punës lidhur me organizimin dhe sistematizimin e brendshëm të saj, si dhe konkluzën për angazhimin e 10 kuadrove me afat të caktuar pune. 

 

Ndryshe, anëtarët e KShZ-së ngritën edhe shqetësimin lidhur me numrin e votuesve nëpër njësi zgjedhore, i cili kalon shifrat që parashikon ligji prej plus-minus 5%. Këtë çështje anëtarët e KShZ-së u dakorduan ta shqyrtojnë veçmas në mbledhjen e radhës.