Shoqata për kulturë dhe art “Tradita” shënon ditëlindjen e 80-të të Ismail Kadaresë

Shoqata për kulturë dhe art “Tradita”, në bashkëpunim me shumë artistë dhe shkrimtarë nga Tetova, mbrëmë shënoi datëlindjen e 80-të të shkrimtarit të mirënjohur tashmë në mbarë botën, Ismail Kadare.

 

Të pranishmit e cilësuan Kadarenë si një ndër  shkrimtarët më të mëdhenj që ka pasur kombi shqiptar, duke e cilësuar madje edhe si  ambasador jo vetëm të kulturës shqiptare.

 

“T’i kushtojmë një aktivitet organizativ edhe shënimit të 80-të vjetorit të gjeniut të letrave shqipe, Ismail Kadaresë, i cili më mirë se kushdo tjetër ka arritur të ngrejë në piedestalin më të lartë letërsinë shqiptare dhe të ngrejë në arenën ndërkombëtare dhe jo vetëm”- deklaroi kryetari i Shoqatës për kulturë dhe art “Tradita”, Selam Sulejmani.

 

“Është një kolos i letrave, një njëri i pazëvendësueshëm, mendoj se nëse ne shqiptarët kemi pasur një dalje në botë me një vepër, është pikërisht Ismail Kadare… Kadareja është personi më tipik që i ka dhënë botës një vepër origjinale shqiptare, ia ka dhuruar komplet, nuk ka asnjë rast të vetëm që Kadareja e ka shkruar në një gjuhë tjetër, por të gjitha veprat i ka shkruar në gjuhën shqipe”- tha profesoresha universitare, Vjollca Berisha.

 

“I kemi borxh gjeniut të kombit dhe princit të kombit, të cilin para 50 viteve e kemi shpallur ambasador të kulturës shqiptare dhe na ka përfaqësuar në të pesë kontinentet”- theksoi profesori universitar, Xhelal Zendeli.

 

“Ishte një manifestim mjaftë i bukur dhe i qëlluar për nderë të 80 vjetorin të lindjes së shkrimtarit më të madh shqiptar, mund të them shkrimtarin që përbën shekullin të cilin e jetojmë, Ismail Kadare. Ishte nder për të gjithë ne poetët që morëm pjesë”- u shpreh profesoresha universitare, Zejnepe Alili-Rexhepi.

 

Shkrimtari i shquar, Ismail Kadare, më 1 janar të këtij viti mori edhe gradën e Komandantit të Legjionit të Nderit, titull ky i dhënë nga presidenti francez, Fransoa Hollande, në ceremoninë tradicionale që u akordohet figurave të shquara në sfera të ndryshme publike qysh prej vitit 1802.

 

Bashkia e Gjirokastrës në Shqipëri e ka shpallur 2016 –ën vitin kulturor të Ismail Kadaresë.