Komisioni Evropian: partitë politike të bëhen konstruktive

Partitë politike në Maqedoni të sillen në mënyrë konstruktive dhe të sigurojnë zgjedhje të besueshme dhe demokratike të parakohshme parlamentare, që sipas Marrëveshjes së Përzhinës janë caktuar për më 24 prill. Kjo është kërkesa e Komisionit Evropian që u dërgua përmes zëdhënëses së komisarit Johanes Han, Maja Kocijançiç.

 

“Komisioni Evropian bëri thirrje disa herë se është me rëndësi të madhe për partitë ta zbatojnë marrëveshjen politike që ata e arritën bashkërisht në qershorin dhe korrikun e kaluar. Bashkëpunimi konstruktiv mes të gjitha palëve është me rëndësi thelbësore që të sigurohen zgjedhje të besueshme dhe demokratike. Komisari Han pret, në interes të shtetit dhe të popullit, të gjithë partitë të punojnë në arritjen e këtij qëllimi”- ka thënë për MIA-n zëdhënësja, Maja Kocijançiç.

 

Nga mesi i muajit të ardhshëm në Maqedoni duhet të arrijë komisioneri për zgjerim, Johanes Han, për të parë se deri ku ka arritur procesi i përgatitjes së zgjedhjeve të parakohshme parlamentare.