Gjykata Administrative, pezullohen 29 vendime të ministrit Spasovski

Pas ankesës së zëvendësministrit të Punëve të Brendshme, Mitko Çavkov, Gjykata Administrative vendosi të mbajë pezull deri në një vendim tjetër 29 vendimet e miratuara para Vitit të Ri nga ministri i Brendshëm, Spasovski.

Nga këto 29 vendime, pesë kanë të bëjnë me  shkarkimin e shefave të sektorëve të punëve të brendshme të Shkupit, Kumanovës, Manastirit, Shtipit dhe Ohrit.

Përveç shefave, Gjykata Administrative me masë të përkohshme i ka shfuqizuar edhe vendimet e Spasovskit për avancimin edhe të 17 personave.

Zëvendësministri i Punëve të Brendshme, Mitko Çavkov, sot në mëngjes përmes një telegrami i ka njoftuar drejtorët e Byrosë për Siguri Publike të Drejtorisë së Sigurimit dhe Kundërzbulimit se janë të detyruar që menjëherë të zbatojnë vendimin e Gjykatës Administrative.

Çavkov në telegram ka përmendur se kuadrot e avancuar në detyrë në mënyrë të paligjshme duhet që të kthejnë në gjendjen e mëparshme edhe mjediset e punës, dokumentacionin dhe automjetet që i kanë përdorur.