Ahmeti takon ministrin Rot, Ahmeti: Zgjedhjet do të jenë të besueshme dhe demokratike

Ahmeti dhe Rot diskutuan rreth çështjeve që mbeten për t’u zbatuar nga marrëveshja e Shkupit, zgjedhjeve të parakohshme parlamentare, si dhe për integrimin euroatlantik dhe çështjen e emrit.

 

Kreu i BDI-së, Ahmeti, njoftoi ministrin Rot rreth rolit dhe angazhimit të BDI-së për arritjen dhe zbatimin marrëveshjes së Shkupit, si dhe pritjet e BDI-së që të respektohet ky dokument në tërësi, përfshirë edhe datën e mbajtjes së zgjedhjeve. 

 

Kodi konsensual zgjedhor u votua në nëntor të vitit të kaluar nga 104 deputetë. Ky kod, përfshirë nenet 78, 82 dhe 83, të cilat përcaktojnë datën e mbajtjes së zgjedhjeve më 24 prill 2016, u mbështet nga BDI, PDSh, LSDM dhe VMRO.  

 

Ahmeti shprehu bindjen që zgjedhjet do të jenë të besueshme, fer, demokratike dhe në përputhje me pritjet e komunitetit ndërkombëtar, por partitë politike duhet që mos të pengojnë punën e institucioneve përgjegjëse për zbatim të zgjedhjeve.

 

Në lidhje me çështjen e emrit, kryetari Ahmeti theksoi nevojën për ndihmë ndërkombëtare në tejkalim të çështjes që po mban peng integrimin e Maqedonisë në NATO dhe BE.