OKB jep alarmin: Asad po ekzekuton të burgosurit

Raporti i hartuar nga Këshilli për të Drejtat e Njeriut pranë OKB-së akuzon drejtpërdrejtë presidentin sirian, Bashar Al Asad, dhe zinxhirin komandues të administratës së tij për krime kundër njerëzimit. 

 

“Shumë të burgosur janë torturuar, disa të rrahur deri në vdekje, të tjerë kanë ndërruar jetë si pasojë e mungesës së ushqimit, ujit të pijshëm dhe përkujdesjes mjekësore”, thotë raporti në të cilin potencohet gjithashtu se edhe forcat e regjimit po ashtu edhe ato opozitare mund të jenë subjekt krimesh lufte.

 

Këto akuza kanë dalë pas marrjes së dëshmive të qindra dëshmitarëve, që përmbledh të gjithë periudhën e konfliktit që prej nisjes së protestave anti-qeveritare, në mars të vitit 2011.

 

Hetuesit e OKB-së besojnë se qindra-mijëra kanë gjetur vdekjen në 5 vite konflikt, ndërsa situatën e përshkruajnë si “emergjencë për mbrojtjen e të drejtave themelore të njeriut”.