Reforma në media, palët amendojnë propozimin e Vanhautes

Palët kanë dorëzuar amendamentet rreth propozim-ligjit për media audio-vizuele dhe po i diskutojnë ato. Ndërmjetësi, Piter Vanhaute, vlerëson se dakordimi i palëve për të amenduar këtë propozim është sinjal, se procesi për reforma në media po lëviz.

 

Ai shprehu habi që VMRO-DPMNE ka parashtruar një listë të gjatë me amendamente, madje edhe për dispozita që nuk i ka kontestuar më parë.

 

 

“Nuk do të pranojmë zgjidhje hibride që nuk mund t’i gjeni në asnjë vend evropian”- ripërsëriti qëndrimin e VMRO-së përfaqësuesi i kësaj partie në bisedime, Ilija Dimovski. Sipas tij, adoptimi i cilitdo ligj, që ka të bëjë me mediat, nga ndonjë vend evropian, mbetet mënyra më e mirë për reformat në media dhe harmonizimin e ligjeve me ato të BE-së.

 

Ndërkaq, përfaqësuesi i LSDM-së në bisedime, Robert Popovski, tha se intervista e liderit të opozitës maqedonase në TV Sitel, një ditë më parë, është një dëshmi se nevojiten reforma thelbësore.  

        

“Prodhimi televiziv i ditës së djeshme plot shpifje, ofendime, gjuhë të urrejtjes, primitivizëm dhe racizëm, edhe një herë e dëshmoi nevojën për reforma në mediat në Maqedoni, jo çfarëdo qoftë, por reforma rrënjësore në media. Vetëm ato janë kusht për zgjedhje korrekte dhe demokratike”- theksoi Robert Popovski nga LSDM.

 

Propozim-ligji për media audio-vizuele i Vanhautes, ndër të tjera, parasheh zgjidhje sistemore për financimin e RTVM-së me një për qind të buxhetit shtetëror; rekonstruim të plotë të servisit publik brenda pesë vjetësh; reklama qeveritare me interes publik pa pagesë; uljen e taksave për mediat nga 18 në 5% dhe dënime për shkeljen e ligjeve sipas madhësisë dhe pushtetit apo shikueshmërisë së mediumit.