Situata me refugjatët, KE ndan 10 milion euro për Maqedoninë

Komisioni Evropian informoi se këto mjete do të përmirësojnë dukshëm menaxhimin e fluksit të refugjatëve dhe të kufijve.

 

Përfaqësuesit e KE-së  vlerësojnë se çdo pengesë të rutës migruese të refugjatëve në Ballkanin Perëndimor do të shkaktonte probleme të mëdha në të gjithë Evropën. 

 

“KE e miratoi programin për të ndihmuar Maqedoninë me 10 milion euro shtesë, që të mund të menaxhojë me sukses krizën e refugjatëve. Qëllimi kryesor i kësaj është të përmirësojë menaxhimin dhe sistemin e monitorimit të kufijve”- deklaroi Margaritis Schinas nga KE.

 

Ndërkohë, nuk ka të ndalur fluksi i refugjatëve në Maqedoni. Vikendin e kaluar në kampin për pranimin e refugjatëve në Gjevgjeli kanë arritur dhjetëra refugjatë.

 

Burra dhe gra, prind me fëmijë në dorë, dhe fëmijë fare të vetmuar vazhduan marshutën e tyre të transitimit përmes Maqedonisë në Evropë.                  

                          

“Unë arrita këtu dhe vazhdoj tranzitimin tim drejt Evropës”- tha një refugjat.    

                       

“Unë vij nga Siria dhe shkoj në Gjermani”- theksoi një refugjat. 

 

“Unë me  të gjithë familjen time mbërrita këtu prej Afganistanit dhe siç na shihni jemi shumë të lodhur, por duhet vazhduar rruga”- u shpreh një refugjat.            

                                          

“Unë jam duke shkuar në Gjermani. Atje nuk më pret askush dhe nuk njoh asnjë person që mund të më ndihmojë, por duhet të gjendem disi”- deklaroi një refugjat.

 

Kriza e refugjatëve në Evropë filloi para një viti e gjysmë. Në Maqedoni përparësi për të kaluar dhe tranzituar tashmë kanë qytetarët nga Siria, Iraku dhe Afganistani. Edhe pse është përforcuar kontrollimi i refugjatëve, sërish në vend po vërehen refugjatë ekonomik me dokumente të falsifikuara, të cilët tentojnë të kalojnë kufirin bashkë me refugjatët hallexhi, thonë autoritetet e vendit. 

 

“Gjatë kontrollimit të refugjatëve shpeshherë na ndodh të zbulojmë dokumente të falsifikuara të refugjatëve ose të regjistrojmë refugjatë ekonomik. Disa prej tyre i kthejmë mbrapsht, ndërsa refugjatët të cilët vijnë nga zonat e luftës dhe u mungojnë disa dokumente të indetifikimit, u lejojmë të kalojnë”- deklaroi një polic kufitar.

 

Sipas të dhënave të MPB-së, prej fillimit të krizës së refugjatëve e deri tani përmes Maqedonisë kanë kaluar mbi 700 mijë refugjatë.