Rasti “Titanik” në Gjykatën Shkupi 1, Jankullovska akoma në pyetje, Guri në liri

Ajo nga Prokuroria Speciale dyshohet për manipulime zgjedhore. Nuk dihet se kur Jankullovska ka ardhur në Gjykatë.

 

Paraprakisht nga ora 10 e mëngjesit, në Gjykatën Shkupi 1 është marrë në pyetje anëtari i  Komisionit Zgjedhor komunal në Çair, Ismet Guri, i dyshuar për manipulim të rezultateve zgjedhore në vitin 2013.

 

Gjykata vendosi që mos të paraburgosë Gurin, ashtu siç është kërkuar nga Prokuroria Speciale. Atij i’u shqiptua masë alternative e sigurisë, ndalesë e kontaktit me persona të caktuar. Guri u shpreh shkurt për vendimin e Gjykatës.

 

“Vendimi i Gjykatës është për herë të parë në rregull, presim hetuesia ta thotë fjalën e fundit”- deklaroi i dyshuari në rastin “Titanik”, Ismet Guri.

 

Ismet Guri është personi i pestë i dyshuar, i cili pas marrjen në pyetje lëshohet në liri. Nga Gjykata bëjnë me dije se sot duhet të paraqiten që të gjithë personat e tjerë për të cilët Janeva kërkoi paraburgim.

 

Në mesin e tyre edhe sekretari i përgjithshëm i Qeverisë, Kirill Bozhinovski. Të premten, pas marrjes në pyetje, u lanë të lirë katër të dyshuarit nga gjithsej tetë, në mesin e tyre edhe ish-ministri i Transportit dhe Lidhjeve, Mile Janakievski dhe kryebashkiaku i Pustecit, Edmond Temellko.

 

Për vendimin e tillë të Gjykatës Penale, Prokuroria Speciale të shtunën ka ngritur ankesë. Gjykata Shkupi 1 për ankesën e speciales do të vendosë në afat prej 48 orësh, pasi që palët zyrtarisht të pranojnë ankesat.

 

Ndaj qëndrimit të tillë kanë reaguar nga Prokuroria Speciale. Sipas tyre, Gjykata Shkupi 1 duhej të vendosë 48 orë nga dorëzimi i ankesave në Gjykatë.