OKB: 50 të vrarë në sulmet ajrore në spitale dhe shkolla në Siri

Organizata “Mjekët pa kufij” tha se nga një sulm ajror është shkatërruar një klinikë e mbështetur nga ky grup, me ç’rast janë vrarë së paku shtatë persona. 

 

Pas këtij sulmi në qytetin verior, Maret al-Numan, tetë persona konsiderohen të zhdukur, por ka shqetësim se ata mund të jenë të vrarë. Observatori sirian për të Drejtat e Njeriut me seli në Londër tha se spitali i mbështetur nga “Mjekët pa kufij” ishte në shënjestër të aeroplanëve luftarakë rusë. 

 

Sipas këtij Observatori, në provincën Alepo, nga një raketë është qëlluar një spital i fëmijëve në qytetin Azaz, duke i vrarë pesë persona. 

 

Sulmi i tretë ajror e ka goditur një shkollë në një fshat të afërt, duke i vrarë shtatë persona dhe plagosur disa të tjerë. Kjo dhunë u bë përkundër arritjes së pajtueshmërisë së fuqive botërore, javën e kaluar, për “ndaljen e armiqësive” në Siri.