Turner: SHBA vazhdon të mbetet partner i fuqishëm i Kosovës

Kryeministri Mustafa, shprehu përcaktimin e palëkundshëm të popullit të Kosovës për vlerat demokratike perëndimore të përfaqësuara nga Shtetet e Bashkuara të Amerikës, duke e falënderuar për përkrahjen e jashtëzakonshme të SHBA-ve, në të gjitha fazat.

Gjatë takimit, kryeministri Isa Mustafa, e njoftoi për përkushtimin e Qeverisë së Kosovës për zhvillim ekonomik, integrime euroatlantike dhe avancim të gjithanshëm të shtetndërtimit në Kosovë, thuhet në kumesën për media, të zyrës së kryeministerit.

Mustafa foli edhe për avancimin e sektorit të sigurisë, me theks të posaçëm për Forcën e Sigurisë së Kosovës si një forcë e konsoliduar dhe e gatshme për transformim në Forca të Armatosura të Kosovës.

Në këtë kontekst, kryeministri Mustafa theksoi suksesin që po arrihet edhe në luftimin e radikalizmit të dhunshëm dhe terrorizmit, duke e njoftuar për masat konkrete të Qeverisë në këtë drejtim.

Gjatë takimit, kryeministri shprehu përkushtimin e plotë të Qeverisë së Kosovës për forcimin e mëtejshëm të partneritetit strategjik dhe të bashkëpunimit me SHBA-të, si përkrahësi më i madh i shtetit të Kosovës dhe popullit të saj.

Kongresisti i Shteteve të Bashkuara të Amerikës, Mike Turner, e vlerësoi lartë progresin që është arritur në Kosovë gjatë viteve të fundit, duke e përgëzuar kryeministrin Mustafa për lidershipin e treguar nga Qeveria e Kosovës në proceset zhvillimore dhe demokratizuese në Kosovë.

Kongresisti Turner, po ashtu, shprehu përkrahjen e mëtejshme të SHBA-ve për Kosovën.

Duke folur për bashkëpunimin e mëtejshme ndërmjet SHBA-ve dhe Kosovës, kongresisti Turner tha se SHBA-të do të vazhdojnë të mbesin partner i fuqishëm i Republikës së Kosovës. (lajmi.net)