Armëpushimi në Siri, qeveria dhe opozita zotohen ta respektojnë

Damasku zyrtar njoftoi se do të ndalojë të gjithë operacionet luftarake në përputhje me planin e përbashkët të miratuar nga Shtetet e Bashkuara dhe Rusia.

 

Por, grupet opozitare thonë se pushimi i zjarrit nga ana e tyre varet nga qëndrimi i ushtrisë së Bashar al-Assadit. Opozita angazhohet të respektojë armëpushimin vetëm nëse edhe ushtria u jep fund rrethimeve dhe sulmeve ajrore ndaj civilëve.

 

Gjithsesi jashtë këtij plani armëpushimi mbeten dy grupe kryesore xhihadiste, ISIS-i dhe rivali i tij, Al-Nusra.

 

Kjo e fundit është një degë e Al-Kaedas dhe ka zgjeruar ndikimin e vet në pjesën më të madhe të aleancës së kryengritësve.

 

Zbatimi i planit të njoftuar një ditë më parë nga Moska dhe Uashingtoni mbetet një sfidë më vete.

 

Organizata e Kombeve të Bashkuara thotë se do të jetë tejet e vështirë që marrëveshja të gjejë zbatim, qoftë edhe të pjesshëm në terren.

 

Të paktën 250 mijë persona kanë gjetur vdekjen nga konflikti 5-vjeçar sirian dhe miliona të tjerë janë zhvendosur brenda dhe jashtë vendit të shkatërruar nga luftimet.