Fatkeqësi në një minierë në Rusi, 26 minatorë dhe 5 punës shpëtimi shpallen të vdekur

Lajmi bëhet i ditur nga burime zyrtare, të cilët poashtu saktësojnë se edhe 4 prej minatorëve humbën jetën nga rrjedhja e metanit, që shkaktoi edhe dy shpërthime të fuqishme të njëpasnjëshme në minierën e Vorkutës, gjatë së enjtes.

 

Punonjësit e kërkimit, që hynë menjëherë në minierë për të shpëtuar 26 minatorët e bllokuar, u goditën nga një tjetër shpërthim i tretë, prej të cilit humbën jetën 5 kërkues dhe një minator.

 

Operacioni i kërkimit është ndalur tashmë, ndërsa personat e pagjetur janë shpallur të vdekur. Ky incident është një nga më të rëndët e ndodhur gjatë kohëve të fundit në ndonjë minierë të Rusisë.

 

“Rrethanat në pjesën e minierës të prekur nga shpërthimet nuk e bëjnë të mundur mbijetesën e ndokujt”, tha ministri rus i Emergjencave, Vladimir Puchkov. “Në nëntokë, ku gjendeshin 26 minatorët, ka temperatura tepër të larta dhe aspak oksigjen”, shtoi ai.