Siri: Respektohet armëpushimi

Monitoruesit në Siri thonë se sot janë kryer disa sulme ajrore kundër caqeve në pjesën veriperëndimore dhe qendrore në Siri, por edhe në ditën e dytë me radhë armëpushimi ndërmjet forcave qeveritare dhe opozitës së moderuar, duket se po respektohet gjërësisht.

Observatori sirian për të drejtat e njeriut, me seli në Londër, thotë se anëtarët e vet në terren në Siri, kanë raportuar për sulme ajrore nga aeroplanët e qeverisë së Sirisë ose ata rusë, në gjashtë qytete në provincën Alepo dhe në një fshat në provincën Hama.

Drejtori i këtij observatori, Rami Abdulrahman, tha se nuk është e qartë nëse eventualisht sulmet ajrore i kanë qëlluar hapësirat që përfshihen me marrëveshje për ndalje të armiqësive. Mediat shtetërore në Siri nuk i kanë përmendur sulmet, ndërsa Ministria e mbrojtjes e Rusisë ka refuzuar të bëjë komente.

Me marrëveshje për armëpushim nuk përfshihen territoret nën kontrollin e grupit ekstremist, Shteti Islamik, dhe Fronti al-Nusra, i ndërlidhur me al-Kaidën, grupe që e kanë nën kontroll gati gjysmën e territorit të Sirisë.