Kim Jong-Un provokon sërisht: Të përforcojmë aftësitë bërthamore

Një kërkesë e tillë vjen vetëm dy ditë pasi Këshilli i Sigurimit pranë Organizatës së Kombeve të Bashkuara vendosi sanksione të reja ndaj shtetit diktatorial.

 

Televizioni shtetëror koreano-verior shfaqi Kim Jong-un teksa fliste me drejtuesit më të lartë të ushtrisë, të cilëve u kërkoi që të qëndronin në gatishmëri për të prezantuar një sulm bërthamor.

 

“Në një kohë të skajshme, kur amerikanët po kërkojnë luftë dhe fatkeqësi në vendet e tjera, e vetmja mënyrë për të mbrojtur sovranitetin tonë dhe të drejtën për të jetuar është për të forcuar aftësinë tonë bërthamor”, ka thënë lideri i shtetit komunist. 

 

Një përgjigje e menjëhershme erdhi nga Shtetet e Bashkuara të Amerikës në lidhje me deklaratat e fundit të Kim Jong-un.

 

“Ne i bëjmë thirrje Koresë së Veriut që të përmbahet nga veprimet provokuese që përkeqësojnë tensionet dhe në vend të kësaj të përqëndrohet në përmbushjen e detyrimeve dhe angazhimeve të saj ndërkombëtare”, tha Bill Urban, zëdhënësi i pentagonit. 

 

Por pavarësisht retorikës së tij agresive, fuqitë ndërkombëtare i kanë vënë në dyshim aftësitë e Koresë së Veriut për të lancuar një sulm bërthamor.

 

Vendi diktatorial ka kryer deri më tani katër teste bërthamore dhe pretendon se testimi i fundit ishte i një bombe me hidrogjen.

 

Megjithatë ekspertët vënë në pikëpyetje mundësitë që ka Koreja e Veriut për ta prezantuar një bombë bërthamore nëpërmjet një rakete.

 

Vendimi i OKB-së për të shtuar sanksionet, nuk u prit mirë nga koreano-veriorët, të cilët vetëm pak orë pas lajmit, shfaqën një test të raketave me rreze të shkurtër.

 

Në bazë të rezolutës së miratuar së fundmi nga Këshilli i Sigurimit, qeveria e Phenianit nuk do të mundet më që të importojë produkte që mund të zhvillojnë kapacitetet e ushtrisë së saj.

 

Megjithatë, nga sanksionet nuk janë prekur ushqimet dhe medikamentet.