Nisma për faljen e krimit zgjedhor, Ziberi: Nisma grusht për marrëveshjen e Përzhinës

Nisma për t’i rikthyer presidentit të shtetit kompetencat që të falë personat të ndjekur penalisht për vepra penale në procesin zgjedhor është një grusht i rëndë për Marrëveshjen e Përzhinës, në tërësi dhe si e tillë duhet të pengohet.

Eksperti juridik, Naser Ziberi, thotë se një vendim i Gjykatës Kushtetuese në favor të kësaj nisme do të inkurajonte pjesëmarrësit në zgjedhje që të vazhdojnë të shkelin ligjet zgjedhore edhe në zgjedhjet e rradhës dhe të prodhojnë zgjedhje jokorrekte dhe rezultat të papranueshëm.

Sipas tij edhe deklarat e zëdhënëses së KE, Maja Kocijajnçiç jepte këtë mesazh.

“Kuptohet që bashkësia ndërkombëtare nuk do të rri duarkryq sepse i gjithë ky proces ka qenë i monitoruar, sponsorizuar dhe i ndihmuar nga Unioni Evropian dhe prandaj deklarata e znj. Kocijanciç jep mesazhe se ky proces duhet të pengohet sepse e dëmton procesin në tërësi dhe në veçanti vë në pikëpyetje ndershmërinë, kredibilitetin e zgjedhjeve të ardhëshme parlamentare” – tha  eksperti juridik,  Naser Ziberi.

Maja Kocijançiq, zëdhënëse e komisionarit, Johanes Han, deklaroi se çdo sugjerim për mos-ndëshkimin e shkelësve të procesit zgjedhor do të jetë në kundërshtim me përpjekjet e vendit dhe komunitetit ndërkombëtar për krijimin e kushteve për zgjedhje kredibile dhe kthimin e besimit të qytetarëve në procesin zgjedhor.

Sipas saj një hap i tillë do të ishte në kundërshtim me vendimin e Parlamentit për formimin e Prokurorisë speciale, e cila duhet t’i hetojë dyshimet për shkeljet në zgjedhjet e kaluara.

Ligji për amnisti, i ndryshuar në vitin 2009, i heq Presidentit të drejtën që të fal persona të akuzuar ose të dënuar për vepra penale, manipulime zgjedhore. (Shpëtim Nuredini, TVM2)