Shkupi turpëron Crna Rekën midis Kavadarit

18.03.2016 15:30

Shkupi mbrëmë në transfertën ndaj Crna Rekës ka shënuar fitoren më të lartë si mysafir këtë edicion duke mundur skuadrën nga Kavadari me rezultatin 10:2...

Ishte kjo një super ndeshje në të cilën “bardhekaltërit” u futën mjaft të motivuar që nga fillimi, ndërsa kur një gjë e tillë ndodh me futbollistët shkupjan, atëherë çdo kundërshtarë e ka të vështirë për ti ndaluar ata. Mbërëmë një gjë të tillë përjetoi skuadra e Crna Rekës, e cila nuk kishte kundërpërgjigje për të përzgjedhurit e trajnerit Lekiq, të cilët pjesën e parë e mbyllën me rezultatin 6:0.

Eroll Dalip paralajmëroi fitoren e Shkupit duke shënuar golin e parë në këtë përballje, që më pas në skenë të dalë Erkan Seferi me dy gola për rezultat 3:0. Eroll Dalip shënoi golin e katërt për Shkupin, ndërsa fundi i pjesës së parë kaloi në shenjë të Rexhep Sulejmanit i cili me dy gola të shënuar bëri që pjesa e parë të mbyllet me rezultatin e thellë, Crna Reka 0, Shkupi 6.

Vendasit e Crna Rekës këtyre 6 golave të Shkupit iu kundërpërgjigjen me dy gola të njëpasnjëshëm për të zbutur rezultatin në 2:6 kur luhej minuta e 26-të e ndeshjes, mirëpo ishte kjo gjithçka që bënë vendasit në këtë takim, pasi në vazhdim ishin futbollistët e Shkupit ata të cilët diktuan tempo dhe krijonin raste para portës vendase, ku si rezultat erdhën edhe 4 gola tjerë të shënuar me autorë Erkan Seferi, Bejtulla Jakupi, Agron Fazilja dhe Erhan Idrizi.

Për Shkupin ishte kjo fitorja e  14 në kampionat, duke u renditur sërish në pozitën e dytë me 42 pikë,  16 më pak se lideri Zhelezareci që mbrëmë mundi Velesin në transfertë me rezultatin 0:6. Në ndeshjen tjetër të zhvilluar po mbrëmë, Ilirët në përballjen shqiptare mundën SEE Univerzitetin me rezultatin 8:3. Java e 20-të në elitën e futsallit në vend mbyllet të dielën me ndeshjet Mal Ajaks – Hedis dhe Skopje – Juventus Serava. Kjo e fundit zhvillohet në palestrën “Enver IDRIZI” me fillim në ora 18:00.