Gjykata e Hagës, 40 vjet burg për Karaxhiq, fajtorë për krime kundër njerzimit

Ish-lideri i serbëve të Bosnjës, Radovan Karaxhiq, është fajtor për gjenocid dhe krime kundër njerëzimit dhe është dënuar me 40 vjet burg nga gjykatësit e Tribunalit të Kombeve të Bashkuara të Hagës.

Gjykata tha se si komandant suprem i Republikës Serbe të Bosnjës, Karaxhiq në vitin 1995 kontrolloi forcat serbe që masakruan 8 mijë burra dhe djemë muslimanë në Srebrenicë. Kjo ishte masakra më e tmerrshme pas Luftës së Dytë Botërore.

Karaxhiq është shpallur fajtor edhe për nëntë akuza të tjerë që përfshijnë vrasje dhe përndjekje, por ai është shfajësuar nga një akuzë e dytë për gjenocid në shtatë qytete dhe fshatra tjera në Bosnjë, gjatë luftës së viteve 1992-1995.

Kjo akuzë e dytë për gjenocid akuzonte Karaxhiqin për udhëheqjen e një fushate, për spastrim të muslimanëve në Bosnjë, si dhe kroatëve, nga të gjitha qytetet në vend.

Gjykatësit e Tribunalit të Kombeve të Bashkuara të Hagës kanë thënë gjithashtu se lideri i serbëve të Bosnjës, Radovan Karaxhiq, është përgjegjës për krime kundër njerëzimit, përfshirë vrasje dhe përndjekje, në komunat e Bosnjës, një nga dy akuzat kryesore me të cilat ai përballej.