Reçicë e Madhe, së shpejti fillon rregullimi i shtratit të lumit

Me këtë do t’i vijë fundi edhe frikës së banorëve lokalë, të cilët shikonin me tmerr çdo përkeqësim të motit nga frika se mos përsëritej sërish tmerri i gushtit të vitit të kaluar, kur lumi doli nga shtrati duke marrë me vete njerëz e shtëpi.

 

Ministria e Ekologjisë dhe komuna e Tetovës nënshkruan sot marrëveshjen për rregullimin e një pjese të  shtratit të lumit.

 

“Sot bëmë edhe marrëveshjen për kofinancim për rregullimin e shtratit të lumit në Reçicë të Madhe, me këtë mendoj se do të bëjmë zgjidhjen e një problemi të kamotshëm, me të cilin si problem janë ballafaquar qytetarët e fshatit Reçicë dhe sot kam kënaqësinë se nga buxheti ynë arritëm të investojmë për sanimin dhe përmirësimin e këtij shtrati të lumit”- deklaroi ministri i Ambienti Jetësor, Nurhan Izairi.

 

“Siç e dini, ne si komunë në mënyrë të rregullt jemi angazhuar për mirëmbajtjen dhe pastrimin e shtratit  të këtij lumi, mirëpo rregullimi i shtratit të lumit në fakt do të japë edhe një garanci të madhe që në situatë të ndryshme të natyrës në fakt të kemi sa më pak probleme”- theksoi kryetarja e Komunës së Tetovës, Teuta Arifi.

 

Mosrregullimi i shtretërve të lumenjve është problem i të gjitha komunave të Pollogut dhe kjo solli edhe pasoja katastrofale më 3 gusht të vitit të kaluar për banorët e këtij rajoni.

 

Nga Ministria e Ekologjisë premtojnë se, në bashkëpunim me komunat, brenda këtij viti të intervenojnë në rregullimin e shtretërve të disa lumenjve të cilët kanë nevojë për intervenim urgjent.