Pengmarrja e avionit në Qipro, autori me eksploziv të rremë, kaloi dy kordone sigurie

Edhe pse arsyet e gjestit të tij ekstrem ende nuk janë zbardhur krejtësisht, tashmë është e qartë se incidenti nuk ka lidhje me terrorizmin.

 

Pamjet e bëra publike nga Ministria e Brendshme egjiptiane tregojnë rrëmbyesin, duke kaluar përmes disa kordonësh sigurie në Aeroportin “Borg El Arab” të Aleksandrisë.

 

Drama e pengmarrjes përfundoi me dorëzimin e Seif El Din Mustafa dhe lirimin e të gjithë pasagjerëve pa asnjë lëndim në Aeroportin e Larnakas.

 

Mustafain zyrtarët qipriotë e përshkruan si “psikologjikisht të paqëndrueshëm”, ndërsa disa kolegë të tyre egjiptianë u treguan edhe më të ashpër, kur thanë se rrëmbyesi nuk ishte terrorist, por thjesht një idiot.

 

Mustafa doli sot përpara një gjykate një Larnaka, ndërsa avioni i rrëmbyer prej tij u nis mbrëmjen e djeshme drejt Kajros, që ishte dhe destinacioni i tij fillestar.

 

Edhe pse situata e krijuar barti në vetvete më shumë shqetësim sesa rrezik real, ai përbën një goditje për autoritetet egjiptiane, të cilat këmbëngulnin se, masat e sigurisë në aeroporte janë përforcuar ndjeshëm pas shpërthimit të avionit rus mbi gadishullin e Sinait në muajin tetor.

 

Por, siç e tregojnë vet pamjet filmike, Mustafai kaloi pa probleme dy kontrolle sigurie e asgjë e dyshimtë nuk rezultoi, as nga verifikimi i çantës së tij.