Posta e Maqedonisë, 120 motoçikleta të reja, 215 mijë euro investim

Motoçikletat janë të parapara për shpërndarjen e dërgesave postare sidomos në vendet rurale dhe në vendet me relacione më të gjata.

 

“Kjo është në vazhdën e aktiviteteve që i ndërmerr Posta e Maqedonisë për përmirësimin e kushteve të punës dhe cilësinë e shërbimeve tona. Filluam me investime në shërbimin e komunikacionit ndërkombëtar, vazhdojmë në pjesën e rrjetit tonë përmes të cilit e realizojmë dërgesën dhe planifikojmë që në të ardhmen të rrisim kapacitetet e qendrës për klientë të mëdhenj”- deklaroi drejtori i Postës së Maqedonisë, Faadis Rexhepi.

 

Postierët përshëndesin këtë investim, pasi që do t’u lehtësohet ndjeshëm puna e tyre e përditshme. 

 

“Këto motoçikleta ne i shfrytëzojmë për të shkuar në rajonet që i kemi, që mos të shkojmë me autobusë apo në këmbë, siç kemi shkuar. Me këto motoçikleta dërgesat do t’i bëjmë më shpejtë”- tha postieri, Muhsin Halili.

 

Ky investim postar kap vlerën prej 215 mijë euro, ndërsa planifikohet që në  pjesën e dytë të këtij viti të realizohet edhe një furnizim tjetër të motoçikletave, me çka do të plotësohen nevojat tjera  të rrjetit postar.