Danielson: institucionet të përkrahin punën e KShZ-së

Kështu tha drejtori i Drejtorisë për Zgjerim në Komisionin Evropian, Kristian Danielson, pas takimit me liderët e katër partive politike më të mëdha në vend.

 

Sipas tij, edhe pse ka shumë punë për t’u bërë, me kujdes të veçantë do të përcjellin përgatitjet për zgjedhjet më 5 qershor. 

 

"Shtyrja e zgjedhjeve dha edhe pak kohë për progres në përgatitjen e zgjedhjeve. Megjithatë, ka ende shumë punë dhe gjatë takimeve u  rekomandova edhe partive edhe institucioneve shtetërore që të punojnë së bashku për të mbajtur zgjedhje të besueshme dhe të marrin pjesë në procesin zgjedhor. Veçanërisht u bëj thirrje zyrtarëve dhe institucioneve shtetërore për të mbështetur punën e KShZ-së në pastrimin e Listës zgjedhore, për të rikthyer besimin tek qytetarët.”- deklaroi kryetari i Drejtorisë për Zgjerim, Kristian Danielson.

 

Danielson thotë se shqetëson fakti që akoma ka raporte për frikësimin e votuesve  dhe u sugjeroi partive politike që të zbulojnë dhe parandalojnë rastet e tilla.

 

Sipas tij, një tjetër element shqetësues është Prokuroria Speciale, pasi që i bëhen shumë pengesa në punë, dhe  kërkoi që të gjithë që janë dakorduar për formimin e PS-së të përmbahen nga sulmet dhe të mbështesin atë plotësisht.

 

Danielson në emër të institucioneve të BE-së vuri në dukje se Marrëveshja e Përzhinës duhet të zbatohet jo vetëm para zgjedhjeve, por edhe të punohet në reformat urgjente që dalin nga Raporti i Pribesë.