Partitë e vogla opozitare paralajmërojnë bojkot

Nga kjo parti vlerësojnë se fillimisht duhet të ofrohen zgjidhje për funksionim normal të shtetit. 

 

“Duke pasur parasysh kaosin me pastrimin e Listës zgjedhore, reformat në media, si dhe injorimin total të rekomandimeve të Raportit të Pribesë, bëhet më se e qartë se vendi është shumë larg zgjedhjeve demokratike. Nëse kësaj ia shtojmë edhe faktin se institucionet e vendit janë para një shkatërrimi total nga mungesa e sundimit të ligjit, atëherë zgjedhjet e njëanshme të pesë qershorit do të jenë një varrosje totale e demokracisë.”- thuhet në kumtesën e RDK-së. 

 

Edhe nga Lëvizja BESA vlerësojnë se nuk ka kushte për mbajtjen e zgjedhjeve dhe se Maqedonia nga kriza e thellë politike ka shkuar më tej dhe tash është buzë greminës. 

 

“Qëndrimi i Lëvizjes BESA ka qenë konsekuent se më e rëndësishme se data e mbajtjes së zgjedhjeve është krijimi i kushteve për zgjedhje të lira, fer dhe demokratike. Sot lehtë mund të konstatohet se nuk janë krijuar kushtet për zgjedhje të lira, andaj përcaktimi i datës për zgjedhje duhej të negociohej dhe të ketë konsensus rreth datës së zgjedhjeve, e jo në mënyrë të njëanshme të shpërbëhet Kuvendi.”- thuhet në deklaratën e Lëvizjes BESA për BotaSot.

 

Mospjesëmarrjen në zgjedhje e paralajmërojnë edhe nga UNITETI. 

 

“UNITETI nuk hyn në zgjedhje pa u realizuar pikat kyçe të Marrëveshjes së Përzhinës, pastrimi i Listës zgjedhore, reformat në media dhe ndarje të partisë nga shteti, sepse nuk dëshiron që me pjesëmarrjen në një proces të tillë të legjitimojë zgjedhjet të vjedhura nga ana e partive në pushtet.”- thuhet në reagimin e UNITETIT.  

 

Qëndrim për të mos dalë në zgjedhje ka marrë edhe Ripërtëritja Demokratike e Maqedonisë.    

                                                                                          

“Nuk janë siguruar kushte për mbajtje të zgjedhjeve të drejta dhe demokratike dhe verifikimi i Listës zgjedhore është bërë në mënyrë joserioze, prandaj RDM-ja nuk ka asnjë bazë për ta ndryshuar këtë vendim, i cili është rivërtetuar në mbledhjen e mbrëmshme të Komitetit ekzekutiv.”- thonë nga partia e Liliana Popovskës. 

 

Qëndrim të ngjashëm kanë edhe nga Lidhja Demokratik e Pavle Trajanovit. 

 

“Pa përgjegjësinë e autorëve të krizës, pa pastrimin e listës zgjedhore, pa reformat në media, në sistemin gjyqësor dhe pa ndarjen e shtetit nga partia, nuk ka kushte për zgjedhje fer, demokratike dhe të besueshme. Qëndrimi i Lidhjes Demokratike është i qartë, se pa plotësimin e kushteve nuk do të marrim pjesë në zgjedhjet e 5 qershorit.”- thonë nga Lidhja Demokratike. 

 

Ndërsa nga LR-PDSh njoftojnë se Kryesia Qendrore e LR-PDSh-së nesër do të mbajë mbledhje, pas së cilës do të njoftohet opinioni për qëndrimet zyrtare të këtij subjekti politik në lidhje me aktualitetin politik.