Shpërbëhet Kuvendi, zgjedhjet më pesë qershor, Veljanovski: Zgjedhjet do t’i shpall më 15 prill

Kryeparlamentari, Trajko Veljanovski, nëpërmjet një komunikate tha se zgjedhjet do t’i shpallë më 15 prill. 

 

“Në pajtim me vendimin për shpërndarjen e Kuvendit, unë si kryetar i Kuvendit, duke u bazuar në kornizat kushtetuese, vendosa që vendimin për shpalljen e zgjedhjeve të parakohshme parlamentare ta nënshkruaj më 15 prill, ndërsa zgjedhjet të mbahen më pesë qershor.”- tha Veljanovski në kumtesën me shkrim. 

 

Zgjedhjet në këtë datë janë kundërshtuar nga lideri i LSDM-së, Zoran Zaev. Ai nuk do të marrë pjesë në zgjedhje, ndërkaq ftoi partnerët e koalicionit, partitë, sektorin civil dhe qytetarët t’i bashkëngjiten platformës së tyre për kthimin e lirisë dhe demokracisë në vend, duke mos përjashtuar edhe protestat në rrugë. “Ose Gruevski ose Maqedonia.”- tha Zaev.

 

“Sot bëj thirrje për krijimin e një fronti të gjerë qytetarë, për një Maqedoni të lirë kundër Nikolla Gruevskit. Bashkë me qytetarët të kthejmë demokracinë, ta sjellim lirinë. Kjo tani nuk është pyetje e përzgjedhjes personale por në pyetje është Maqedonia dhe e ardhmja e saj.”- theksoi lideri i LSDM-së, Zoran Zaev.

 

Zaev tha se po shqyrtohen të gjitha mekanizmat ligjore për tërheqjen e ministrave të tyre nga qeveria teknike. Nesër pasi të analizohet e gjithë situata me partnerët e koalicionit, do të vendosin edhe për tërheqjen ose jo të anëtarëve të tyre nga KShZ. 

 

I menjëhershëm ka qenë reagimi i liderit të VMRO–DPMNE-së, Nikolla Gruevski. Sipas tij, Zaev u ik zgjedhjeve pasi që është i bindur në humbje. Sipas tij, zgjedhjet janë rrugëdalja e vetme nga kriza e krijuar dhe për mbajtjen e tyre ka kushte.

 

“Kushte për zgjedhje ka dhe ato do të mbahen. Më vjen keq për konferencën e mbrëmshme për media të Zaevit. Sinqerisht, shpresoj se do ta ndryshojë vendimin. Ftoj që ta bëjë këtë! Kjo nuk është betejë e Gruevskit dhe Zaevit. Kjo është betejë për Maqedoninë. Apeloj atë që sinqerisht të mendojë pa marrë parasysh mendimin e tij personal për mua. Populli do zgjedhje, populli do që kriza të përfundojë, populli do që shteti të shkojë para. Mjaft më!”- u shpreh lideri i VMRO-DPMNE-së, Nikolla Gruevski.

 

Kreu i BDI-së, Ali Ahmeti, në një intervistë për Alsat-M tha se nuk ka alternativë tjetër përpos që zgjedhjet të mbahen më pesë qershor. Ai ka ftuar liderin e LSDM-së, Zoran Zaev, për pjesëmarrje në zgjedhje për të mirën e ardhmërisë së vendit. 

 

PDSh akoma është pa qëndrim konkret.