Gruevski: Kemi liri dhe demokraci, LSDM gënjen

Sipas tij, në Maqedoni nuk mungon as liria dhe as demokracia, nuk mungon as liria e shprehjes, siç pretendon opozita. 

 

Ai konsideron se opozita i frikohet zgjedhjeve, prandaj nuk merr pjesë në zgjedhjet e qershorit.

 

“Qëndrimet e tyre të ndryshueshme për tema serioze dhe absurditeti i kushteve që vendosin, më së miri e sqarojnë destruktivitetin e  tyre, me të cilin duan t’a infektojnë gjithë shtetin. Konstruktiviteti ynë për çdo temë edhe rreth punës së Komisionit Shtetëror, edhe për Listën zgjedhore, pastrimin e saj dhe rreth çdo gjëje tjetër shohim se si është keqpërdorur hapur. Ndërsa, LSDM sillet në formë me të cilën luan me fatin e mbi dy milionë njerëzve.”- deklaroi kryetari i VMRO-DPMNE-së, Nikolla Gruevski.

 

Sipas Gruevski, nga shoshitja e bazave të të dhënave nga më shumë institucione ka rezultuar se në Listën zgjedhore ka vetëm 582 votues të kontestueshëm.   

 

“Mjaft me gënjeshtrat dhe shtimin e 300, 400, 500 votuesve inekzistentë, kur në fund rezultoi në 582 votues, adresat e të cilëve nuk janë shënuar në të gjitha bazat e informatave që po shoshiten për t’u kontrolluar.”- tha kryetari i VMRO-DPMNE-së, Nikolla Gruevski.

 

Kreu i VMRO-së akuzoi opozitën edhe për gjendjen ekonomike. Sipas tij, kriza politike që ka gjeneruar opozita i ka sjellë dëm ekonomisë vendore.