Belgjikë, shtohen masat e sigurisë kudo në vend

Pas sulmeve në Bruksel, që shënjestruan aeroportin ndërkombëtar të qytetit dhe një stacion metroje, masat e sigurisë janë shtuar ndjeshëm në qendrat e transportit në Belgjikë, por edhe në të gjithë Evropën.

 

Ushtria dhe policia janë të pranishme në aeroportin “Charleroi” gjatë gjithë kohës dhe kontrollojnë njerëzit e makinat që para se të hyjnë në zonën e aeroportit, qofshin pasagjerë apo jo.

 

Aeroporti pranon 90 fluturime në ditë, 20 më shumë se zakonisht për të kompensuar disi problemet nga aeroporti “Zaventem”, i cili po punon me një të pestën e kapacitetit.

 

Në stacionin e “Eurostarit” në Bruksel, aty ku mbërrijnë trenat nga Londra dhe Parisi, forcat e sigurisë kanë shtuar kontrollet e rastësishme të njerëzve e bagazheve. 

 

Ndërkohë, në Francë, autoritetet kanë dislokuar të paktën 3 000 oficerë policie civilë dhe të armatosur në trenat e vendit për të parandaluar sulme të tjera.

 

Në Bruksel, 39 nga 69 stacionet e metrosë mbeten të mbyllura pas sulmeve të 22 marsit, pasi ka mungesë personeli sigurie për t’i mbikëqyrur.

 

Gjithnjë e më shumë fraksione politike në Evropë po kërkojnë mbikëqyrje më të rreptë të çdo pasagjeri që hyn apo del nga Evropa për të gjurmuar të dyshuarit për terrorizëm.