Migrantët protesta të reja në Gjevgjeli; Ivanov, Pahor dhe Kitaroviq nuk shkuan në pikën 59

Organizatat ndërkombëtare që shërbejnë në kampin në Idomeni alarmojnë se rreth 12 mijë refugjatët në kamp, mes tyre edhe 5 mijë e 500 fëmijë përballen me kushte tejet të vështira.

 

Protestat në kufi detyruan presidentin e Maqedonisë, Kroacisë dhe Sllovenisë, Gjorgje Ivanovin, Kolinda Grabar Kitaroviqin dhe Borut Pahorin, të anulojnë vizitën e paralajmëruar në vendkalimin kufitar 59 në kufirin Maqedoni-Greqi.

 

Tre presidentët arritën vetëm deri në qendrën e pranimit të refugjatëve në Gjevgjeli. Pak metra më tej, migrantët kërkonin t’u lejohet të vazhdojnë rrugën drejt BE-së. Por, presidentët thanë se korridori ballkanik për transitim të migrantëve nuk do të hapet.

 

“Migrantët edhe më tej insistojnë të hapet ruta ballkanike, por ajo mbetet e mbyllur, derisa shtetet që ata i kanë si destinacion nuk deklarohen nëse do t’i pranojnë apo jo. BE dhe vendet anëtare patjetër të japin porosi të qartë se çka më tej, sepse ky presion i migrantëve nuk do të ndalet derisa ato porosi nuk do të jenë të qarta.”- deklaroi presidentja e Kroacisë, Kolina Grabar Kitaroviq.

 

“Korridori është në këtë gjendje për shkak të vendimit të Brukselit dhe ne e respektojmë atë vendim, dhe derisa një vendim i tillë është në fuqi, Maqedonia patjetër të sillet kështu, ta ruaj kufirin e saj dhe në atë mënyrë edhe korridorin në të cilin në periudhën e kaluar kanë transituar pothuajse 1 milion migrantë.”- theksoi presidenti i Maqedonisë, Gjorge Ivanov.

 

Kroacia dhe Sllovenia do të vazhdojnë të ndihmojnë Maqedoninë për t’u përballur me krizën e migrantëve, qoftë nëpërmjet pranisë së pjesëtarëve të policisë apo edhe me mbështetje materiale.