Këndi i lojërave në Tiranë, përplasje e ashpër Nishani-Veliaj

Shkak për një seri fyerjesh në adresë të njëri-tjetrit është bërë këndi i lojërave që po ndërtohet te liqeni artificial në kryeqytetin shqiptar.

 

Gjithçka ka nisur pasi presidenti njoftoi se do të vizitonte protestuesit. Kryebashkiaku Veliaj e cilësoi një veprim të tillë të kreut të shtetit si qesharak dhe tha se Bujar Nishani do të mbahet mend si i pari president në botë që prish një kënd lojërash për fëmijë.

 

Nga mjediset e parkut të liqenit ka reaguar presidenti, duke u shprehur se këto janë sulme rrugaçërore në adresë të institucionit të presidencës.

 

Këndi i lojërave në mjediset e parkut të liqenit artificial është kundërshtuar që në fillim nga shoqëria civile, e cila ka akuzuar bashkinë se po betonizon të vetmen “mushkëri” të kryeqytetit. Por, sado që Veliaj e ka mohuar një gjë të tillë, duket se betoni nuk do të mungojë.