ShGM: Të lirohet urgjentisht gazetari Bozhinovski

Shoqata e gazetarëve të Maqedonisë kërkon nga autoritetet gjyqësore që të shfajësohet dhe të lirohet menjëherë gazetari, Zoran Bozhinovski, i cili aktualisht ndodhet në paraburgim në Shkup.

 

Përmes një komunikate nga ShGM thonë se Bozhinovski është i fajësuar në mënyrë të padrejtë, dhe, sipas tyre, ky veprim do të jetë shembull klasik për të arritur efektin e frikës, disiplinës dhe vetëcensurës në mesin e gazetarëve, si dhe dekurajon gazetarët investigativë të cilët janë duke hetuar lidhje të biznesit, politikës dhe krimit.

 

Sipas ShGM-së, kjo është një akuzë e montuar politikisht dhe si e tillë është e papranueshme.

 

Zoran Bozhinovski u  arrestua në Novi Sad, si i dyshuar për rastin “Spiun”, nën akuzën për konspiracion kriminal, spiunazh dhe shantazh.