Situatë kritike në Idomeni, i ftohti përkeqëson kushtet për migrantët

Kushtet atmosferike të ditëve të fundit kanë përkeqësuar ndjeshëm situatën në kampin e Idomenit, duke i degraduar edhe më shumë kushtet e jetesës për mijëra emigrantë që po jetojnë prej disa muajsh në kufirin greko-maqedonas.

 

Organizatat humanitare vijojnë të raportojnë se gjendja e refugjatëve në tendat e këtij kampi është e mjerueshme, mungon higjiena dhe medikamentet, dhe për pasojë edhe ndihma mjekësore.

 

Përveç kushteve atmosferike të rënduara, refugjatët janë përballur edhe rritjen e numrit të gjarpërinjve në zonën ku ndodhet kampi.

 

“Po, kemi parë disa gjarpërinj. Për momentin situata është deri diku nën kontroll, megjithatë po mundohemi të marrim masa për të reduktuar numrin e gjarpërinjve.”- deklaroi koordinatori i Organizatës “Mjekë pa kufij”, Emanuel Massart.

 

Mbi 10 mijë emigrantë janë vendosur në kampin e Idomenit në kufirin mes Greqisë dhe Maqedonisë me shpresën për të kaluar në vendet e Evropës Perëndimore, duke refuzuar t’i përgjigjen thirrjeve të qeverisë greke për t’u sistemuar në qendrat e pritjes të ndërtuara nga autoritetet. 

 

Marrëveshja BE- Turqi duket se nuk po ndalon fluksin, edhe pse të dhënat flasin për frenim të tij.

 

Me të njëjtin qëllim, Norvegjia po provon të blejë largimin e emigrantëve nga vendi, duke u ofruar 840 euro për këdo që largohet vullnetarisht.

 

Ministrja e Emigracionit dhe Integrimit, Sylvi Listhaug, tha se “kjo inkurajon emigrantët të kthehen në vendet e tyre dhe kështu kursejmë para, pasi mbajtja e tyre na kushton më shumë”.