KShZ-ja miratoi raportin për kontrollin e votuesve; LSDM: Mbi 160.000 votues të kontestueshëm

Ndërkaq, kanë njoftuar se do të vazhdojnë korrigjimin e Listës së zgjedhësve edhe gjatë periudhës së këqyrjes publike me kërkesë të qytetarëve dhe subjekteve politike. 

 

Mirëpo, Lista e zgjedhësve vazhdon të kontestohet nga opozita maqedonase. Sipas LSDM-së, Lista zgjedhore nuk është pastruar, prandaj nuk plotësohet as kushti bazë për mbajtjen e zgjedhjeve më pesë qershor.

 

“139.438 qytetarë janë pa adresë ose pa letërnjoftim të vlefshëm dhe mbeten në Listën e zgjedhësve, 18.269 persona që aspak nuk u janë gjetur aplikimet ose kërkesat për letërnjoftime në MPB mbeten në listë, 5.420 votues nga Pusteci akoma, sipas informacioneve tona nga KShZ-ja, mbeten në listën e zgjedhësve.”- deklaroi Stefan Bogoev nga LSDM.

 

Bogoev i bëri thirrje ekspertëve ndërkombëtarë, të cilët, në kuadër të IFES, po bëjnë kryqëzimin e të dhënave brenda KShZ-së, që të deklarojnë, publikisht, nëse Lista e zgjedhësve është pastruar ose jo.  

 

“IFES është pala e tretë që duhet profesionalisht të thotë nëse Lista e zgjedhësve është e pastruar ose jo, kështu që mendimi i tyre është më shumë se dëshmi e mjaftueshme për të gjitha këto që ne e themi në lidhje me Listën e zgjedhësve dhe në aspektin e mospasjes së kushteve për zgjedhje të drejta dhe demokratike.”- theksoi Stefan Bogoev nga LSDM.

 

Bogoev, në emër të LSDM-së, iu drejtua njësisë komunale të KShZ-së në komunën Qendër për të marrë listën e plotë të votuesve në këtë komunë, por u refuzua nga punonjësit me arsyetimin se në këtë fazë të inspektimit publik ai mund të verifikojë vetëm veten. 

 

Edhe organizata CIVIL hedh dyshime mbi Listën e zgjedhësve. “Mënyra, cilësia e udhëheqjes së procesit, të gjithë dyshimet që i ngriti puna e KShZ-së dhe partitë politike për klimën në përgjithësi, tregon se si qytetar nuk mund të kemi besim në listën e zgjedhësve”. 

 

Ndërkohë, Partia Liberal-demokrate akuzoi KShZ-në se vepron me direktiva partiake dhe nën dirigjimin e pushtetit. Sipas kësaj partie, KShZ ka miratuar raportin përmbledhës për kontrollet e kryqëzuara, administrative dhe në terren nën presion.