Shënohet Dita e dëshmorëve – 5 Maji, nderohen të rënët për idealet kombëtare

Në këto homazhe morën pjesë familjarët e dëshmorëve dhe veprimtarëve, invalidëve të luftës dhe pjesëtarë të pushtetit qendror dhe atij lokal.

 

Në shenjë nderimi për gjakun e derdhur dhe sakrificën e tyre për idealet kombëtare, sot u bënë homazhe në varrezat ku prehen dëshmorët e kombit dhe veprimtarët e kauzës shqiptare.

 

Pas Strugës, karvani i pjesëtarëve të ShVL të UÇK-së u ndal në Kërçovë, ku u bënë homazhe për veprimtarët, Gafurr Zendeli, Abedin Hyseni e Medin Emini dhe për të vazhduar në varrezat e fshatit Kollarë, ku lule të freskëta u vendosën tek varret e dëshmorëve, Beqir Limani dhe Ruzhdi Veliu. 

 

“Sot përkujtohen të gjithë dëshmorët e kombit të rënë për atdhe, për të respektuar veprën e tyre madhore dhe përkushtuese, e cila njëherit është edhe mesazh për gjeneratat e reja.”- potencoi veprimtari Fatmir Limani, i cili shtoi se Dita e 5 Majit përkujton përjetësinë e dëshmorëve dhe veprimtarëve të kombit, të cilëve u jemi mirënjohës për gjakun e derdhur, sakrificën e madhe dhe veprat e tyre që do t’u shërbejnë gjeneratave të reja si mësim dhe frymëzim për misionet e kauzës kombëtare.

 

Ai në emër të familjeve i falënderoi të gjithë ata që e respektuan veprën e tyre përkushtuese dhe më pas të gjithë u përulën përpara atyre që e dhanë jetën për komb e atdhe.