Tiranë, reforma në drejtësi, përplaset politika

Një ditë pasi ambasadori amerikan, Donald Lu, lëshoi deklarata të forta për reformën në drejtësi, Ambasada amerikane ka vendosur të marrë pjesë në mbledhjet e PS-së, LSI-së e PD-së.

 

Por, pavarësisht se në fillim nuk kundërshtuan, duket se ato nuk janë më dakord që diplomatët e huaj të jenë të pranishëm në mbledhjet e tyre.

 

Fillimisht, ishin demokratët ata që anuluan këtë mbledhje. Afro një orë më pas u njoftua edhe anulimi i mbledhjes së grupeve parlamentare të PS-së dhe LSI-së.

 

Ende nuk dihen arsyet e anulimit të mbledhjeve apo nëse do të mbahen në të ardhmen. Ndërkaq, Ambasada amerikane njofton se po punohet që këto takime të mund të realizohen në javën e ardhshme.

 

Kjo iniciativë e ambasadorëve për të qenë prezent gjatë diskutimeve në mbledhjet e grupeve parlamentare ka shkaktuar debate edhe në seancën parlamentare. Për kryeministrin Rama kjo është një gjë normale.

 

“Reforma në drejtësi është një projekt i përbashkët, tërësisht i përbashkët. Në këtë pikë, thjesht për informacion, Shqipëria nuk bën përjashtim nga asnjë prej vendeve që i janë bashkuar familjes evropiane.”- deklaroi kryeministri i Shqipërisë, Edi Rama.

 

Ndërsa për deputetin, Ben Blushi, “ky është fundi i parlamentarizmit dhe se amerikanët po tallen me politikanët shqiptarë”.

 

“Çmimi është tallja me ne, përçmimin e këtij parlamenti, kësaj klase politike dhe në fund shfarosja si specie e kësaj klase politike. Jemi shumë afër shfarosjes, proces që shqiptarët për 25 vjet nuk e bënë dot me votë dhe Shqipëria ndoshta do të jetë më mirë kur ne të ikim.”- tha deputeti i PS-së, Ben Blushi.

 

Ambasadorët, Lu dhe Vlahutin, morën pjesë një ditë më parë në Komisionin e Reformës në Drejtësi, ku iu drejtua deputetëve se nëse dështon reforma në drejtësi, ky do të jetë një turp për zgjedhësit, ShBA-të dhe Bashkimin Evropian.