Maqedoni
BDI: PDSH të përgjigjet për dosjen “Interpromet”
18.03.2014 18:58
Vazhdojnë përplasjet midis PDSH-së dhe BDI-së rreth akuzave të fundit për skandalin korruptiv...
Vazhdojnë përplasjet midis PDSH-së dhe BDI-së rreth akuzave të fundit për skandalin korruptiv. Pas padisë penale që dje e ngriti Talat Xhaferi ndaj Bekim Fazliut dhe PDSH-së, ky i fundit sot tha se pranon të shihet në gjyq me ministrin e Mbrojtjes, Talat Xhaferi. Ai, madje kërkoi nga Gjykata Themelore e Shkupit, që ky proces të fillojë dhe të mbarojë para zgjedhjeve parlamentare.
“Doli një veprim i qëlluar dhe Talat Xhaferi pranoi me gjithë qejf të shihemi në gjyq dhe apeloj deri te gjykata, që ky proces të fillojë sa më parë dhe të përfundojë deri sa ju jeni në pushtet, para 27 prillit, pasi që kemi edhe shumë çështje tjera që duhet zbardhur”, deklaroi Bekim Fazliu nga PDSh.
Në mungesë të programit partiak, ideve dhe në mungesë të personaliteteve me ndikim partiak brenda fushatës zgjedhore parlamentare, PDSH po përpiqet të merret me cinizëm dhe shpifje, reagoi Bashkimi Demokratik për Integrim. Sekretari i përgjithshëm i kësaj partie, Abdylaqim Ademi, përkujtoi dosjen e PDSH-së opozitare “Interpromet”.
“Kjo flet edhe njëherë për cinizmin flet edhe njëherë se ato nuk kanë me çka të merren dhe shqiptarët presim përgjigje nga Partia Demokratike Shqiptare, veçanërisht presin përgjigje për dy çështje. Pse e legjitimoi procesin zgjedhor për zgjedhjet presidenciale me kandidatin Iljaz Halimi dhe a është kandidati Iljaz Halimi kurban për moshapjen e dosjes së “Interprometit” në Tetovë?. Kjo është përgjigja që presin shqiptarët dhe ne nuk do të merremi më me pres-konferencat e tyre, derisa nuk e marrim këtë përgjigje”, tha Abdylaqim Ademi nga BDI.
Ministri i Mbrojtjes, Talat Xhaferi, dje dorëzoi padi penale për shpifje dhe ofendime në Gjykatën Themelore 2 ndaj Bekim Fazliut. Ai, do të duhet të japë sqarime rreth akuzave që i ka drejtuar Xhaferit për aferë korruptive. (Rexhep Qamili, TVM2)