BPM dhe ShBM: Ktheni paratë në banka, janë më të sigurta

Vetëm në muajin prill qytetarët nga bankat dhe kursimoret kanë tërhequr depozita në vlerë prej 3,6 miliardë denarëve, ose 1,6 për qind nga depozitat e përgjithshme.

Kjo ka detyruar Bankën Popullore të  intervenojë në  tregun devizor me 77 milionë euro. Por, nga Shoqata e bankierëve konstatojnë se gjendja në sektorin e bankave është drejt përmirësimit dhe në afat të shkurtër pritet normalizimi i tërësishëm.

“Gjendja në sektorin bankar është përmirësuar edhe pse kishim spekulime në lidhje me devalvimin e denarit. Në periudhën që vjen presim që gjendja plotësisht të normalizohet. Aktualisht vërehet një tendencë për kthimin e parave në banka me krijimin e depozitave të reja. Apeloj tek  të gjithë ata që tërheqin depozitat, t’i kthejnë të hollat në banka, pasi atje janë më të sigurta.”- deklaroi drejtori i Shoqatës së Bankierëve, Kosta Mitrovski.

“Bankat u përballëm me një stres test real dhe treguan se dinë t’a përballojnë këtë sulm të fuqishëm. Bankat u përballën mirë me këtë sfidë pikërisht për shkak të likuiditetit të lartë dhe kapitalizimit të mirë, si dhe nga niveli i lartë i rezervave revizore.”- theksoi guvernatori i Bankës Popullore, Dimitar Bogov. 

Gjithsesi, sipas Bankës Popullore, për dallim nga krizat e kaluara të vitit 2011, 2008 dhe 2009, devizat të cilat janë tërhequr kësaj radhe janë mbajtur në vend.

Nga Shoqata e bankierëve japin edhe lajmin e mirë se tani për tani nuk mendojnë për rritje të normave të interesit të kredive, madje po bëhen analiza dhe pjesa më e madhe e bankave mendojnë të ofrojnë shkallë kamatore më atraktive për depozitat në denarë. (Gazmend Rexhepi, TVM2)