BDI i drejtohet kushtetueses, kërkon vlerësim për shpërndarjen e kuvendit

Me këtë iniciativë, BDI kërkon që vendimi të shpallet jokushtetues, duke bërë të mundur që Kuvendi të mblidhet përsëri.

Nga BDI thonë se tani është në duart e Gjykatës Kushtetuese nëse do të shpëtohet shteti apo jo nga kriza politike.

Por, kështu nuk mendon Lidhja Demokratike e Pavle Trajanovit, nga e cila thonë se para tre muajsh kishin dorëzuar një iniciativë të tillë në Gjykatën Kushtetuese.

Ata kundërshtojnë nismën e BDI-së, duke shtuar se si parti opozitare kishin paralajmëruar se deri te Gjykata Kushtetuese do të ngrenë nismë për ndryshim të vendimit për mbajtjen e zgjedhjeve të parakohshme.

Nga Lidhja Demokrate njëherit insistojnë në qëndrimin se ka bazë kushtetuese dhe juridike për rikonvokimin e kuvendit.

“Nëse ka nismë, të paktën nga 20, ndërsa në këtë rast po përpiqemi të grumbullohen 62 ose 63 nënshkrime nga deputetët që duan ose kërkojnë të thirret seancë e jashtëzakonshme e parlamentit, pas grumbullimit të këtij numri të nënshkrimeve, në mënyrë obligative kryetari i kuvendit do të thirr seancë, në të kundërtën, vetë deputetët munden të organizojnë dhe të mbajnë seancë.”- deklaroi kryetari i Lidhjes Demokratike, Pavle Trajanov, i cili për këtë nismë ka kërkuar edhe mbështetjen e BDI-së, PDSh-së dhe LSDM-së, të cilat po ashtu nuk kanë parashtruar lista të kandidatëve për pjesëmarrje në zgjedhjet e 5 qershorit. (Nermin Mulaki-Fejzullahu, TVM2)