OKB jep alarmin: 50 mijë civilë në Falluxha, në rrezik

Kombet e Bashkuara kanë shprehur shqetësim për fatin e rreth 50,000 civilëve në qytetin Falluxha të Irakut, ku forcat qeveritare kanë nisur një ofensivë për çlirimin e tij nga grupi militant Shteti Islamik 

 

Përfaqësues të OKB-së thonë se civilët janë në “rrezik të madh” dhe kanë kërkuar krijimin e korridoreve të sigurta për ta. Situata humanitare padyshim se mbetet e paqëndrueshme, pasi luftimet vazhdojnë, thonë nga OKB.

 

Ushtria, policia dhe milicitë aleate të Irakut kanë nisur të hënën operacionin për rimarrjen e Falluxhas, e cila ndodhet rreth 50 kilometra në perëndim të Bagdadit.

 

Falluxha ka qenë qyteti i parë që është pushtuar nga Shteti Islamik në janar të vitit 2014. Rreth 10,000 familje që jetojnë atje, janë përballur me mungesa të ushqimit dhe gjërave të tjera të domosdoshme.